Wha'll buy my caller herrin'?
They're bonnie fish and halesome farin';
Wha'll buy my caller herrin',
New drawn frae the Forth ?

When ye were sleepin' on your pillows,
Dream'd ye aught o' our puir fellows,
Darkling as they faced the billows,
A' to fill the woven willows?

Wha'll buy my caller herrin',
New drawn frae the Forth.

Wha'll buy my caller herrin'?
They're no' brought here without brave darin',
Buy my caller herrin',
Haul'd through wind and rain.

Wha'll buy my caller herrin',
New drawn frae the Forth.

Wha'll buy my caller herrin'?
Oh, ye may ca' them vulgar farin',
Wives and mithers maist despairin',
Ca' them lives o' men.

Wha'll buy my caller herrin',
New drawn frae the Forth.

When the creel o' herrin' passes,
Ladies, clad in silks and laces,
Gather in their braw pelisses,
Cast their heads and screw their faces.

Wha'll buy my caller herrin',
New drawn frae the Forth.

Wha'll buy my caller herrin'?
They're bonnie fish and halesome farin';
Wha'll buy my caller herrin',
New drawn frae the Forth?

Air by Niel Gow
Carolina Oliphant, (Lady Nairne), 1766-1845

Return To Scottish Songs